На I Форуме рэгіёнаў Беларусі і Узбекістана падпісана пагадненне аб супрацоўніцтве паміж Мінаблвыканкамам і Хакіміятам Ташкенцкай вобласці

30 ліпеня, у другі дзень правядзення I Форуму рэгіёнаў Беларусі і Узбекістана, падпісаны шэраг міжрэгіянальных пагадненняў аб супрацоўніцтве. Мінскі абласны выканаўчы камітэт і Хакіміят Ташкенцкай вобласці заключылі пагадненне аб супрацоўніцтве ў сацыяльнай сферы.

Намеснік старшыні Мінаблвыканкама Мікалай Рагашчук, у асобе якога было падпісана пагадненне, адзначыў, што за апошні час у Ташкенцкую вобласць было здзейснена больш за дзесятак візітаў, як з боку аблвыканкама, так і бізнесменаў. «Мінскай вобласцю там створана сумеснае прадпрыемства «Здравушка Ташкент»па будаўніцтве малочна-таварнай фермы і завода па перапрацоўцы малака, заснавальнікам якога выступіла беларускае прадпрыемства ААТ «Здравушка-мілк». Таксама ў Ташкенце адкрыты фірмовы магазін трыкатажных вырабаў кампаніі «Марк Фармэль», паспяхова пастаўляюцца кар'ерныя самазвалы БелАЗа. - распавёў у інтэрв'ю «Мінскай хвалі» Мікалай Рагашчук. - Тавараабарот паміж Мінскай і Ташкенцкай вобласцю, Узбекістанам за першыя пяць месяцаў гэтага года вырас у тры разы ў параўнанні з аналагічным перыядам мінулага года».

Выступаючы на пленарным пасяджэнні Форуму з дакладам, намеснік старшыні сказаў, што паміж Мінскім аблвыканкамам і Хакіміятам Ташкенцкай вобласці ў кастрычніку мінулага года падпісана пагадненне аб супрацоўніцтве, якое ахоплівае практычна ўсе сферы дзейнасці. Зараз яго напаўняюць канкрэтнымі праектамі. У 2018 годзе экспарт Міншчыны ў гэтую краіну склаў амаль 13 мільёнаў долараў. «Мы прадаем узбекскім партнёрам аўтамабілі, мясныя і малочныя вырабы, цукар, лесаматэрыялы, прадукты перапрацоўкі нафты, рухавікі, лекавыя прэпараты і многае іншае. Актывізаваўся рух тавараў і ў зваротным кірунку. Закупляем баваўняную пражу, трыкатажныя палотны, гародніну і садавіну, сухафрукты, арэхі», – прагучала ў дакладзе Мікалая Рагашчука. Таксама ён распавёў аб магчымасцях Мінскай вобласці ў інвестыцыйным плане і прывёў канкрэтныя прыклады перспектыўных праектаў. Да прыкладу, удзел у тэндэры на заключэнне кантракта з узбекскім бокам прыме кампанія «Штадлер Мінск», у планах – пастаўкі для чыгунак Узбекістана рухомага саставу. Раней прадпрыемства «Пожснаб» выйграла тэндэр на пастаўку пажарнай тэхнікі для міжнародных аэрапортаў «Наманган» і «Самарканд». Таксама Узбекістан зацікаўлены ў закупках лекавых прэпаратаў беларуска-галандскай кампаніі «Фармлэнд», якая дзейнічае на тэрыторыі Міншчыны.

Форум рэгіёнаў стаў новай старонкай у адносінах Беларусі і Узбекістана, якая адкрывае вялікія магчымасці. Аб гэтым сказала намеснік старшыні Савета Рэспублікі Нацыянальнага сходу Мар'яна Шчоткіна ў час пасяджэння.

Старшыня Савета Рэспублікі Міхаіл Мясніковіч выказаў меркаванне аб тым, што I Форум рэгіёнаў стварае перадумовы для выхаду на канкрэтныя праекты, кантракты, пагадненні як на ўзроўні гаспадарчых суб'ектаў, так і непасрэдна рэгіёнаў або галін.

Чытаць 20 разоў

1